Es esch halt ebe scho toll, echli Wasser und alli send Happy. Nach de Wasserschlacht esches denne zum grille und chille gnage, wobi d Jungs natürli nacher ganz ganz ganz churze Pause scho weder nacheme Ball gschraue händ zum Fuessballspele. 

So jetzt muesi also öpis säge. Eigentlich esches bim Desserbuffet vorgseh gsi, dases en Zitronechuechebättel git zwösche de Christina erem und dem vom Rolf. Wie ich weis händ siche beidi deheime en Saumüeh geh. Dur luts klatsche joole und und juble hets au en Siegerin geh. D Christina het de Pokal inklusive Biozitrone gonne gha. Die beide sind sich aber subitoschnell einig gsi das de Pokal en andere Chueche oder ebe anderi Backfee mues becho. Das Superteil vode Arta het alles in Schatte gstellt. Optisch wie au gschmacklich eifach de Hammer.

Jetzt beni de au langsam dore, jetzt machi no es gnusch ide Reiefolg. also vorem Chuecheprogramm esch ja no de Komet des Jahres gwält worde. Es unglaublich knapp gsi het de Chef verzapft, aber am Schluss het de Sieger Ramon gheisse er het 12 vo de mögliche 55 Pönkt gha. 

Glich spannend esch die ganzi Gschickt bim SHARK des Jahres gsi. Do het de Jeremy mit 2 Pönkt Vorsprung gonne. Au wenns do knapp gsie esch, ich finde De Jeremy het sich das verdient, er esch wärend de ganze Saison en unglaubliche Rückhalt gsi förd Mannschaft.

Wie ali Johr esch d  Nummerewahl de krönendi Abschluss vode SHARKSPARY. De Chef het weder glaberet und glieret und verzellt als döfti er zum letschte mol schwätze. Aber sini Wort händ mer gfalle, het er doch zu jedem SHARKY wo is C got en grossi Portion schöni Wort gfonde. Und..... er glaubets gar ned, das Johr het er ned mol eine vergesse.

De erschti wo sini Nummere het döfe ussueche esch de Danilo gsi. Es het rechtig us sim Chopf graucht, er het studiert und studiert öb er echt im Brüeder sini Nummer sel ne oder ned. Wer weiss wie die 2 send de chan ischätze was das bedütet das de Danilo d Nummere vom Alessio öbernimmt. 

Als zwoits het de Kirstijan (Kris) döfe sini Nummere wähle. Öb die Nummere 4 jetzt wegem Mauro oder wegem Ramos isch weisi ned so genau. Wenn ich mer aber vorstelle was mer us dene beidne Jungs fören Kicker chan bastle,h.... Im Mauro sin fightingspirit gepaart metem Kirs sinere coolness am Ball im Mauro sinere Chopfballstärki und de Öberischt vom Kris, mol das gäbdi en gäbige Spiler

Als nächschts esch de Mattia dra gsi. De esch wie gstüred ufd Nummere 15 Losglaufe. Glaub mues mol luege wer bi Juve die Nummere het. Aber vom Spielertyp her passt das ja usgezeichnet. Ich denke jede weis was ich meine wenn ich säge das de Ball eri beschti Frönd esch. Aber.... beidi chönd denne au ganz heissi Päss spile, ich denke do döfed sich beidi Teams uf 2 ganz tolli Spiler freue.

De nächschti wo sini Nummere het döfe ussueche esch de Luan gsi. Er hätti am liebschte d nummere 4 gha, die esch ebe scho weg gsi darum het er eifach minus eis grächnet und denne ebe d Nummere 3 gwählt. S drü het vorher de Mihael gha, ergendwie passt das aber ebe scho au. Send doch beides keini Grossplauderis und eher Defensiv dänkendi wo aber trotzdem gern mol im Strofrum vom Gegner chli gönd go umenosche.

De nächschti und de zwoitleschti esch de Strahlema Albion gsi. Bie eschd Uswahl nöme so gross gsi, aber au er het ned lang müesse überlegge und esch zielstrebig ufd Nummere 1 zuegstüred. Die het ja vorher bekanntlich de SHARK des Jahres de Jeremy gha. Ich glaube au das passt eso, zwar send do scho gwössi underschied zum erkenne, aber d frächheit met em Ball am Fuess, die esch bi beidne glich. 

Als letschts esch de no de Eurpameischter Andre dra cho. Sini Nummere het lescht Johr niemert gha, das esch Captainnummere gsi vom Andrin. Aber es git au do paralele. Beides kei Dampfplauderis, nur wenns Temperament wörkli mol choched ghörtmer si. Wenn de Andre jetzt no öpe glich vell Goal macht wie de Andrin bi de SHARKS, denne chönd mer aber es paar mol jubiliere und senge.

So mini Liebe, das wärs gsi vom Partytag, met velne Idrück, Emotione und vollne Büch. Ich chan nur säge das ich mich brutal freue uf das wo chunt met dene Speler und Fans, mer send en glatte Hufe wo sicher ned alli immer ganz Hugo send, aber das machts ebe grad us, chli ufmöpfig sie scho guet. Also mini Liebe, bis bald und SHARK ATTACK